اشتباكات وكر وفر في تظلمات الثانوية العامة

شاهد بالفيديو : اشتباكات وكر وفر في تظلمات الثانوية العامة

وعلى صفحته كتب الصحفي أحمد حافظ بوست بعنوان ماذا يريد الطلاب والأهالي والمعلمين من وزير التعليم الجديد؟:

أولا: يبدأ العام الدراسي ١ أكتوبر، تكون جميع الكتب في المدارس.. مش الطالب يحضر والكتاب هو اللي يغيب.

ثانيا: عدم ربط المصروفات بتسليم الكتب للطلاب.. (حضرتك متعاقبش الطالب بسبب ظروف أسرته).

ثالثا: مع بداية العام الدراسي تكون كل الأمور محسومة وواضحة ومعلنة.. مواعيد الامتحانات.. شكل الامتحانات.. طريقة الامتحانات، يعني يتكتب عقد بين الوزارة والطلبة إن الامتحانات هتبقى شكلها كذا، ورقية، إلكترونية، مقالية، اختيار من متعدد، علشان كل واحد في المنظومة يرتب أموره ومحدش بعد كدة يتفاجئ بحاجة جديدة.

رابعا: وضع خطة لسد العجز في المعلمين.. حضرتك عارف إن فيه حوالي ٣٠٠ ألف معلم عجز.. فلازم ولابد يكون فيه خطة غير تقليدية لسد العجز ده.. بالحصة بالتعاقد بالتطوع، بس قبل كل دة، يكون سد العجز من بدري، يعني المديريات متبدأش تعلن عن حاجتها لسد العجز في شهر ١٠ و١١ وعلى ما يخلصوا الإجراءات يكون الترم الأول خلص.

خامسا: حقوق المعلمين المهضومة ومش عايز أقول المنهوبة.. لازم ترجع.. وكلامي عن حافز تطوير التعليم اللي الحكومة موافقة عليه ورصدت له مئات الملايين وفيه معلمين لسه ما أخدوش منه حاجة.. كلامي عن معلمي الحصة بتوع السنة اللي فاتت والمديريات بتتعنت معاهم ومش عايزة تصرف لهم حقوقهم.. كلامي عن حقوق المعلمين اللي بياخذوا حصص زيادة من غير مقابل.. متطلبش من المعلم ينتحر في الفصل ومعندوش الحد الأدنى من الرضا الوظيفي اللي الحكومة وافقت عليه.

سادسا: المناهج الجديدة بتاعت رابعة وخامسة تحديدا.. تكون محسوبة باليوم على مقاس عدد أيام الدراسة وغير كدة يترحل أو يُعاد النظر فيه ومفيش حاجة تتساب للمدارس علشان العام الدراسي يمر بسلام.

سابعا: لا تُجرى أية امتحانات خاصة بأولى وتانية ثانوي تحت مسؤولية الإدارات والمدارس وكفاية المهازل اللي عملوها في امتحانات السنة اللي انتهت.

ثامنا: لا تُجرى أية امتحانات إلكترونية لأولى وتانية ثانوي إلا بضمان كفاءة البنية التكنولوجية بنسبة ١٠٠٪؜.

تاسعا: تعديل طريقة امتحانات الثانوية العامة: لا بابل شيت في المطلق ولا تصحيح إلكتروني في المطلق.. لازم أسئلة مقالية يكتب فيها الطالب بإيده.. أسئلة الاختيار من متعدد فكرة جيدة ولكن: الاختيار من متعدد سهل الغش.. الإجابات المقالية تقيس مهارات الفهم والتعبير وغيرها، وتكشف الغش الجماعي، وبعدين لازم الطالب يكتب ويعبر والمجتهد فقط هو اللي ينجح ويوصل والغشاش يتكشف.

عاشرا: وضع حد لظاهرة التسريب والغش الجماعي الفاضح في الشهادة الإعدادية.. لازم ولابد يتم التعامل مع الشهادة الإعدادية بطريقة لا يكون فيها أي تسريب قبل الامتحانات بساعات.. والعام الدراسي المنتهي خير دليل.

حادي عشر: إعادة النظر في أغلب القيادات المسؤولة عن إدارة المنظومة التعليمية.. سواء في الديوان أو المديريات.. أغلبهم لا علاقة له بالمنصب ولا التعليم ولا المسؤولية من قريب أو بعيد: وحضرتك عارفهم بالاسم وعندهم قدرة غير عادية على نصب الشباك حولين أي مسؤول علشان يظهروا الولاء وهم في الحقيقة أعداء.

ثاني عشر: إعادة النظر في مشكلات مدارس المتفوقين اللي محدش سامع لطلابها ولا أهاليهم.. وضبط علاقة المدرس الخاصة بالأهالي، علشان إدارة التعليم الخاص في الوزارة تقريبا شغالة مع المدارس الخاصة مش لصالح طلاب المدارس الخاصة.

= عن نفسي أطالب بشيء وحيد: إجراء تدريبات مكثفة لطلاب الثانوية العامة على الامتحانات المقبلة، ومنع عقد امتحانات الثانوية العامة في أي لجنة حدث فيها شبهة غش جماعي هذا العام، وتحديدا لجان (العائلات الكبيرة) في صعيد مصر، طالما لا عارفين نمسك اللي بيغش ولا اللي بيغشش ولا نثبت الغش.. مع إعلان نتيجة التحقيقات في هذه الوقائع خاصة أن الوزارة هي من تعهدت بالتحقيق.