تغير نظام الثانوية العامة الحالي

استراتيجيه وزارة التربية التعليم القادمة

2024 : تغيير منهج الصف الاول الاعدادي 

2025 : تغيير منهج الصف الثاني الاعدادي 

2026 : تغيير منهج الصف الثالث الاعدادي 

2027 : تغيير نظام الثانوية العامة والغاء النظام الحالي وتحويله إلى نظام المسارات يعني دفعة سنة ستة بتاعت العام الحالي هي اللي هيبدا معاها تطبيق النظام ده

النظام الجديد في الثانوية العامة باختصار شديد: مش هيكون فيه لا علمي ولا أدبي ولا تشعيب أصلا.. الطالب لما يوصل الثانوية العامة هيلاقي حاجة اسمها مسارات تعليمية وكل مسار فيه مجموعة مواد.. وكل مسار يوديك لمجموعة كليات معينة.. عايز كليات علمية هتاخد المسار ده.. عايز كليات نظرية هتاخد المسار ده.. عايز كليات كذا هتاخد المسار ده، وهكذا.. ولو في جيت في نص الطريق ولقيت نفسك اخترت مسار غلط انت مش حابب تكمل فيه.. هتغيره عادي وتختار مسار تاني.

= بالنسبة بقى لامتحانات الثانوية العامة: هتكون من أكتر من محاولة.. مش هتكون فيه امتحانات من فرصة واحدة ولا مستقبل الطالب هيتحدد من امتحان مدته ساعتين تلاتة زي دي الوقت.. هتكون فيه عدة محاولات امتحانية.. نجحت دور أول وعايز تحسن مجموعك هتقدر تحسن بعدها بأسابيع في امتحانات جديدة.. والمجموع اللي هتجيبه بعد التحسين هو اللي هتدخل بيه الكلية.

= الكلام ده مش هيطبق قبل 3 سنين.. يعني هيكون أول تطبيق على الطلبة اللي بتدرس في نظام التعليم الجديد.. اللي هم في الصف السادس والخامس، والصفوف اللي تحتهم.. أما اللي بيدرس حاليا في أولى وتانية وتالتة إعدادي، هيكملوا في نظام الثانوية الحالي (القديم يعني).

= ومن هنا لحد ما تتعمل ثانوية عامة جديدة، مفيش أي تغيير في الثانوية العامة الحالية: التشعيب مستمر، والتحسين مش هيطبق، والامتحانات كما هي.. والمناهج كما هي.. ودي خطة الرئيس السيسي نفسه متابع تنفيذها.. يعني سواء استمر الوزير، رحل الوزير، نظام الثانوية الجديد هيطبق، والثانوية العامة الحالية هتتلغي .