القائمة الرئيسية

الصفحات

 



سلسلة تعريف الكليات : كليةالطب



مقالنا هيتكلم عن طب ونظام الدراسة فيها وغيره..

(آه هو مقال 😂 وتفتكر لو مش هتصبر ع مقال خمس دقايق قراءة هتصبر ع 7 سنين دراسة؟ 🤔)

ودا أول تحدي ف كلية طب إنها عدد سنينها طويلة شوية 😁

وبما إنه مقال فممكن تكسلوا تقروه للآخر، بس دا كويس عشان فعلًا المقال ده للمهتمين فقط. 👌

عشان مينفعش تدخل الكلية دي بالذات (أو غيرها) من غير شغف، من غير إهتمام، مينفعش تضيع سنين ومجهود من عمرك وإنت أصلًا داخل عشان ماما وبابا عايزين كده وإنت أحسن من ابن خالتك الدكتور وبلا بلا، مينفعش إطلاقًا.


نبدأ بسم الله ^^


📍التنسيق:

كلية طب عمرها ما قلت عن 97,5% أيًا كانت الجامعة، وأقل مجموع بيبقى للقاهرة واسكندرية عشان مساحتهم أكبر وبيستوعبوا عدد طلبة أكبر وكل ما بقت الكلية أصغر زي المنصورة وطنطا مجموعها بيعلى، ودا عامل أساسي ف التنسيق 😃


وبالتالي طب محتاجة مجهود قبل وبعد وأثناء دراستها، فتلاقي طلبة طب مستحيل يقتنعوا بجملة " اتعب دلوقتي عشان ترتاح بعدين" 🤷‍♀️


📍نظام الكلية ودراستها:

الكلية في مصر 7 سنين: 6 دراسة، وسنة امتياز 

(سنة امتياز = سنة تدريب عملي إجباري بتطبق فيها كل ال درسته ال6 سنين، وبيكون في مستشفيات الجامعة، وهنتكلم عنها بالتفصيل تحت).


أما عن ال6 سنين دراسة فابيتقسموا علي مرحلتين: 

- المرحلة الأكاديمية.

- المرحلة الإكلنيكية.


- المرحلة الأكاديمية: 

هي أول 3 سنين، وبتكون دراسة أكاديمية بتدرس فيهم مواد نظري زي الأناتومي (علم التشريح)، فسيولوجي (علم وظائف الأعضاء)، هستولوجي (علم الأنسجة)، فارماكولوجي (علم الأدوية)، بيوكيمستري (كيمياء عضوية)، جينتكيس او الامبريولوجي (علم الوراثة)، باثولوجي (علم الامراض)، باراسيتولوجي (علم الطفيليات)، ميكروبيولوجي (علم الكائنات الدقيقة).

والمواد في ال٣ سنين دول مش أقل من 4 مواد وف بعض الجامعات بيبقوا 6 .


- المرحلة الإكلينيكية: 

تاني 3 سنين، بتكون دراسة إكلينيكية clinical، ومن معناها بتتعامل فيهم مع المريض بنفسك وبتدرسهم عمليًا وبتدرس فيهم المواد اللي هتتخصص فيها بعد الكلية زي الأطفال و الباطنة والجراحة والرمد و ونسا وتوليد وطب المجتمع وهكذا. 


📍الامتحانات:

معظم الجامعات في مصر ماشية بنظام السنة الواحدة يعني مفيش امتحانات فاينال بعد نهاية الترم الاول لا، المنهج بيكمل معاك وبتمتحن مرة واحدة آخر السنة زي القصر العيني والمنصورة وطنطا وشبين الكوم، لكن في جامعات ودي عددها أقل بتمتحن فاينال بعد كل ترم زي بنها.

أما جامعة اسكندرية فيها نظام (الموديول)، يعني إيه؟

يعني بناخد جهاز في جسم الانسان وبندرس كل مواده مرة واحدة وتمتحن علي كل جهاز.

مثال: هتيجي تدرس القلب هتدرس المواد النظري كلها مرة واحدة للجزء اللي يخص القلب وبعدين تمتحن على المواد دي في آخر الترم، وبعدين الجهاز العصبي مثلا تاخد كل ال يخصه وتمتحن وهكذا. 


خلصتوا إمتحانات سنة سادسة على خير؟ 🎉

بعدها بكام شهر تظهر نتيجتها ومتاح التظلمات 🤝


وبعدها هتطلع نتيجة المجموع التراكمي (مجموع درجاتك في ال6 سنين) 

بعد المجموع التراكمي عندنا حاجتين مترتبين عليه: 

1. الترتيب العام للدفعة (الأول ع الدفعة والتاني وهكذا)

2. التقدير العام: امتياز، جيد جدًا، جيد، مقبول.

⚠️ممكن تسمع لفظ "تقديرك(وليكن امتياز) مع مرتبة الشرف" معناها إن مفيش ولا سنة من ال6 سنين تقديرك قل عن امتياز، وهكذا.


المجموع والترتيب ده بقى هيفرق معاك في كل حاجة تقريبا جاية في طريقك بعد كده، فلازم تركز وتذاكر من الاول 😀


📍سنة الامتياز: 

زي ما قولنا هي سنة تدريب إجبارية، وهي شرط عشان يبقي معاك شهادة معتمدة سواء جوا مصر أو براها 😅

بمعنى انك دلوقتي خلصت ال 6 سنين بيكون معاك "شهادة تخرّج مــؤقـــتة" لحد ما تاخد الامتياز بتاعك ويبقي معاك شهادة رسمية 👌


سنة الامتياز بتبقي 12 شهر بالتمام والكمال بتبدأ غالبًا في 1 مارس بعد النتيجه ما تظهر، وبتشتغل طبيب إمتياز في مستشفيات الجامعة الرئيسي وبتتعامل مع المرضى في عنابر وعيادات المستشفي وبتكون مسئول عنهم وعن متابعة علاجهم ونباطشيات نهار وليل وكده.


ممكن تقضي جزء من سنة الامتياز في مستشفيات جامعة تانية أو في مستشفيات وزارة الصحة في أي محافظة تانية عادي، وممكن تقضي كذا شهر منه في دولة تانية خالص بس بتتدرب على تخصص معين على حسابك.

⚠️كل ده له شروط وإجراءات وقواعد بتعرفها بعد كده


بعد ما خلصت الامتياز علي خير مبروك انت اخيرًا معاك بكالريوس الطب والجراحة وفعليا اتخرجت وبيعملولك حفلة التخرج الرسمية، وهتنضم بعدها لنقابة الأطباء وتعمل "ترخيص مزاولة المهنة" ومهنتك "طبيب بشري - ممارس عام" مبروووك 🎉🎉🎊


بس لا البوست مخلصش لا 😁

وافتكر ان انت اللي دُست "قراءة المزيد" و أنت ال اخترت تكمل اوكيه؟ 🤭😂


📍 التكليف

هو فترة عمل إجبارية لأي طبيب عاوز يشتغل ويكمل في وزارة الصحة، أنت بتتوزع فيها على الوحدات الصحية ومراكز طب الأسرة ومكاتب الصحة. 

وفيه نوعين رئيسيين: 

1. إما بتتوزع على وحدة داخل المدينة 

2. أو بتتوزع على المناطق النائية زي المحافظات الحدودية (مطروح وسينا والبحر الأحمر وأسوان وغيره، أو بعض المناطق الصحراوية)، وال غالبا بتبقي باختيارك. 


طيب ليه واحد هيروح باختياره الأماكن دي؟ 🤔

بيقي ليها مزايا مالية وإدارية ومزايا ليها علاقة بالنيابات هتعرفها بعدين.


طيب التكليف بيحصل إزاي؟ 

في آخر شهرين في الامتياز (الي هما يناير وفبراير) كل الدكاترة ال اتخرَّجوا من نفس الدفعة على مستوى الجمهورية بيسجلوا رغبات التكليف على النت في مكان وموقع واحد، والرغبات ليها قيود. 


📍خلصنا 6 سنين دراسة وسنة امتياز وتكليف، نروح للتخصص بقي 😁 

التخصص هو آخر حاجة ف طب، ومنطقي جدا تبقي فاهم فكل التخصصات عشان لو جالك مريض تعرف تشخصه صح، وكمان لو هو مش تخصصك تعرف توجهه للتخصص الصح 👌


📍وبعدين مرحلة النيابات ال فيها التخصص الفعلي وال بيكون من خلال إنك تحضر ماجيستير في التخصص اللي إنت عايزه.


وبكدا تكون خلصت رحلتك الأكاديمية، وبتبدأ عالم الشغل وممارسة الطب بشكل حر تحت رقابة وزارة الصحة 👏


الرحلة طويلة أه، بس هتكون ممتعة لل حاببها ☘

وبما إنك كملتها للآخر فأنت عندك رسالة وهدف من المكان دا، وكلنا شاكرين جهود الأطباء ال من غيرهم هنكون بنعاني من المرض والجهل والخرافات سنين..


الطب رسالة سامية جدا وجزاءكم كبييير جدا، لو دا هدفك وحلمك ورسالتك، متخليش قلة التقدير المادية ف البلد تخليك تتنازل عن حلمك. 


بالتوفيق 😇☘

هل اعجبك الموضوع :

تعليقات

التنقل السريع