سلسلة تعريف الكليات : كلية زراعة
شباب الكليات والتنسيق العظيم .. ازيكوا ^^
نظرا ان مصر دولة زراعية بالدرجة الاولي🌳 .. ونظرا برضو اننا ماشين فيها بالبركة وعلى حسب كلام الناس والي بيقولوه وبس 🙂
ففيه كليات كتير بتضيع في وسط الشكليات دية .. وبيتبصلها على حسب المجموع وبس .. ومبيتعملش حساب اذا كان الكلية والمجال ده مهم وبينفع الناس ولا لا 🤦♀️
وكلية زراعة على رأس الكليات دي
هتلاقي ان اللي بيدخل الكليه دي وبيعرف اللى بيتدرس فيها نظرته بتتغير عنها تمام وبيعرف اد ايه هى مهمة❤
مبدأيا كده الكليه ٤ سنين … وممكن تدخلها من علمي بس .. وموجوده ف كتير من جامعات مصر في :
· زي القاهرة
· وعين شمس
· والزقازيق
· واسيوط وغيرهم.
الكلية بتاخد من التلت مراحل عادي واحيانا بتاخد لحد مجموع 80% وفيه سنين كتيرة بتبقي اقل كمان
ممكن لحد 75% مثلاً
ودي حاجة بتختلف من سنه للتانيه حسب التنسيق طبعاً
نيجي للاقسام بقي..
ومش معني ان دي كليه زراعة ان انت هتبقي بتزرع بس يعني! لأ خالص يعني
الكلية دي فيها 20 قسم … اه زمبؤلك كدا
يعني 20 تخصص تقدر تختار بينهم براحتك متخيل 😌
بس الاقسام ديه بتختلف من جامعة للتانيه … وفي جامعات كتيره مش هتلاقي فيها كل الاقسام دي،بس الي هنقول عليهم دول اشهر الاقسام الي ممكن تلاقيها في زراعة ف العموم يعني:
عندك بقا اقسام زي
1. قسم الإنتاج الحيوانى والسمكي.🐟
2. وقسم إنتاج الدواجن.
3. وقسم الغابات وأشجار خشبية.
4. وقسم أمراض النبات.
5. وقسم علوم الأراض.
6. وقسم المحاصيل والفواكة والخُضَر.🍊
7. وقسم البساتين.
8. وقسم النبات الزراعى.
9. وقسم الزهور ونباتات الزينة وتنسيق الحدائق.🌸
10. وقسم الاقتصاد وإدارة الاعمال الزراعية.
11. وقسم الاقتصاد المنزلي.
12. وقسم علوم الأغذية وتقنية الألبان.🥛
13. وقسم علم الحشرات التطبيقي.
14. وقسم المجتمع الريفى.
15. وقسم الإرشاد الزراعى.
16. وقسم المايكرو بيولوجيا الزراعية.
17. وقسم علوم الأراضي والمياه.
18. وقسم الكيمياء الحيوية الزراعية.
19. وقسم كيمياء وتقنية مبيدات الآفات.
20. وقسم الوراثة.
والاقسام ديه كلها ممكن تدخلها لو كنت علمي علوم
اما لو علمي رياضه فبيبقي قدامك قسم هندسة زراعية .. وده هتدرس فيه طريقة تصميم شبكات الري الحديثة سواء بالرش أو بالتنقيط للمزارع ولكن بتوسُّع طبعا..
القسم ده شغله يختلف شويه عن باقي اقسام الكلية لانك هتبقي مهندس🤓 ومطلوب في كل المزارع الكبيره .. وهتبقي المسئول مع فريق الصيانه وتصميم شبكات الري والابار .. وصيانه كل المعدات الزراعيه والتعديل عليها .. وبتتعاقد على المعدات الزراعيه والجرارات..
وانت ممكن تدخل أى قسم من الي اتكلمنا عليهم
ولكن دلوقتى فيه نظام اسمه المجالات بمعنى انك عشان تدخل قسم لازم تدرس المواد الى تبع مجال القسم الي انت هتدخله.
عندك مثلا : مجال وقايه النبات بيتكون من 3 اقسام او بمعنى اصح هتلاقي فيه تلت اقسام الي مرتبطين بمجال وقايه النبات وهما (قسم حشرات - وقسم مبيدات - وقسم امراض نبات )
يعني لو دخلت مثلا قسم حشرات يبقي لازم تدرس كورسات من القسمين التانيين الي هما مبيدات وامراض النبات وده بيفيد جدا فى الشغل علي فكره.
وعموما التخصص بيبدأ من سنة تالتة، يعني بتتخصص تالتة ورابعة. ولكن القاهرة و عين شمس التخصص من أولى و خاصة لو هتدخل انجليزي.
فى سنة أولى وتانية بتاخد مواد بتوضح كل اقسام ومجالات الكليه عشان تقدر تحدد بعدها هتختار انهى تخصص.
وطبعا فيه أقسام على حسب التقدير العام واقسام على حسب تقدير مواد معينة وعشان كده لو عايز قسم أو مجال معين لازم تشد حيلك فى المواد اللى القسم ده محتاجها عشان تتقبل، بالإضافة الي إن كل قسم بيكون محدد عدد طلبة معين عشان يدخلوه فشد حيلك قوي💪
نيجي بقا لنظام الدراسة
سنة أولى : بتاخد فى الترم 7 مواد
أغلب مواد سنة أولى بتبقي أحياء و كيميا وفيزيا ووراثة يعني مثلا زى مواد (كميا عضويه - وعلم حشرات - وعلم حيوان - وعلم النبات - وكميا تحليله )
وفيه كمان مواد أدبيه وإحصائية ( زي اقتصاد زراعى - و مجتمع ريفى )
وان شاء الله انت عندك خلفية عن المواد ديه من ثانوية عامة.🤓
سنة تانية : بتاخد مواد جديدة عليك
وبتكون اكتر مجالاتها نباتى و صناعى
زى مواد ( علم الألبان و نباتات الزينة و أساسيات الفاكهة و علم تصنيع الاغذية وأساسيات الخضر وكده )
بتحدد تخصصك ف معظم الكليات ف تالتة زي ما قولنا وبتكون أخدت فكرة عن كل قسم.
والدراسة في الكلية.. المفروض عملية،
بس للأسف الواقع غير كده كالعادة🤦♀️ فممكن نقول إن التلت بيبقى عملى فعلا والتلتين نظرى وهتلاقي في مواد كلها عملى ومفيهاش نظرى.
بس عامة يعني العملى في الكلية ممتع جدا فى كل الاقسام، وجزء العملي ده بيعتمد على ميزانية الكلية💲. يعني في جامعات بتجيب أدوات وفيه جامعات لا وانت وظروفك بقا.
طبعا هتقولي العملي بيبقي عباره عن ايه ؟
بص بقا هو بيختلف جامعه لغيرها وحسب المستوي برضو.. بس كله بيبقي في معامل مخصصه وحسب القسم بتاعك بيبقي شكل العملي
يعني مثلا قسم وقايه النبات .. العملي بتاعه بيقي في ٥ معامل تقريبا
عندك معمل مبيدات
ومعمل مكافحة الحيوية وإنتاج التطفلات
ومعمل النمياتودا والاكاروس
رمعمل الدراسات البيئية
ومعمل الفسيولوجي
وهكذا..
وملحوظة صغيره عن جامعة القاهره .. عشان هيا مختلفه شوية عن باقي الكليات يعني ماشيه بنظام الساعات المعتمده وفيها انجليزي ودولي وعربي وكده
لغة الدراسة (عربي-انجليزي-فرنساوي ) طب بيعتمد الانجليزي علي درجتك في الانجليزي ولازم تكون 80 % فيما فوق انما بالنسبة للفرنساوي متاح قسم الالبان بس فدرجتك في الانجليزي 80 %فيما فوق +الفرنساوي 75% فيما فوق وبتدرس في اولي وتانية بالانجليزي وتالتة ورابعة بالفرنساوي .بس بيبقوا مصاريفهم عالية عن العربي علي حسب كل جامعة برضو
طيب احنا متفقين من الاول انك اكيد مش هتتطلع من الكلية تزرع والهبل ده .. بس انت هتشتغل ايه بقا؟🤓
بص خريج زراعة ممكن يشتغل
في شركات استيراد وتصدير
وممكن في شركات كيماويات
وحجر صحى في المزارع
وشركات الاغذية والألبان ومزارع فاكهه و معهد الدراسات العليا والبحوث للزراعة والمنطق القاحلة من اكتر الحاجات اللى متوفرة فى الشغل بس بتكون عايزة تقدير عالى هى مراكز البحوث.
ومجالات وفرص الشغل بتفرق من قسم للتاني .. بس بحاجات بسيطه يعنى بنسبه 10% القسم بتاعك بيفرق فى الشغل
فمثلا فيها اماكن ومجالات شغل بتحتاج للشباب أكتر وبيبقى صعب على البنات🙍♀️، زي شغل الشركات والمصانع والمزراع وبتحتاج شغل بليل.
لكن البنات غالبا بتبقى مطلوبة اكتر في الشغل الإداري والمعامل🤷♀️.
وأهم حاجه عشان تلاقى فرص شغل كويسة وتعرف تحدد قسمك .. حاول تروح للدكاترة اللى هتعرفهم فى الكلية وهما هيعرفوكم على مجالات الشغل والقسم اللى هتختاره.وهيعرفوا الشركات إنكم موجدين . لإن فيه شغل كتير بيبقى عايز خريجين زراعة بس صعب يوصلولهم🤦♂️، وحاول يكون ليك علاقة مع الي اتخرجوا عشان يساعدوك.
ودور على شغل او علي تدريب علي جوجل من أول سنة كلية وقدم فيه
وهتتقبل وهتكون الشركات دى عايزاك بعد ما تتخرج وكل التدريبات هتتحط فى السي ڤي بتاعتك في الاخر 🤓
اخر حاجه خالص 😶 التقدير سهل في الكلية🤕، والكلية جميلة وممتعة للي يحطها في دماغه . وممكن تشتغل فيها من وانت لسه في الكلية.
فحاول تستفيد بكل حاجة بتتعلمها عشان هتفيدك بعدين.🤓
ربنا يوفقكو في الي جاي🌸
تعليقات
إرسال تعليق